學瑜伽

昨天跟友人Agnes研究學學瑜伽，雖然口口聲聲話學瑜伽已好一段時間，但還是由友人推一推才動一動。對瑜伽所知無幾，決定動身報名之前先了解這個名字吧！在網上四處遊歷一番發現有一個組織叫霎哈嘉瑜伽Sahaja Yoga http://www.sahajayoga.org.hk/ 內有詳細介紹有關瑜伽的來源、歷史、派別、信念等等，得知原來坊間大部分所講所教的只是瑜伽八大部分之初部，實在瑜伽的精髓還在冥想 (meditation)。但再繼續往內裡看發覺所講有關Sahaja Yoga的功績如：〝巳有科學工作者和霎哈嘉瑜伽練習者一同為霎哈嘉瑜伽進行醫學、農業、化學工程等科學研究。其中有研究員因此取得醫學博士銜。一項有關改變灌溉用水的研究顯示：非混種種子的農作物因接受了帶『生命能量』的水灌溉而顯著減低肥料的需求，收成卻大為提高。〞實在有點誇張之嫌，但我的好奇心又叫我去試一試…反正不收任何費用。

他約我去迪士尼

前兩日留意到近排有首歌響 internet 好似幾 hit 咁，首歌叫 "他約我去迪士尼"，由一個 18 歲女仔創作兼主唱，風格都幾梁詠琪，不過佢聲底好過梁詠琪，感覺好 fresh，唔錯。http://www2.hkedcity.net/sch_files/a/tpp/tpp-a3570/public_html/dis.mp3

畢生也願記起　香港迪士尼　煙火璀璨夜晚定會很美 坐咖啡杯　溫馨記憶　旋轉中細味　天邊星宿也沒法比

會唔會有一日我都可以有一首自己的作品呢？....

Back to School Camp

Report on “Back to School Camp”
Written by Maze

日期：2005年5月28 - 29日
地點：新界元朗大棠保良局渡假村

天氣？真係估佢唔倒

諗起今次宿營越諗就覺得好好玩好開心，天氣？真係估佢唔倒 … 之前星期五晚還傾盆大雨，星期六下午竟放出太陽來，我啦、Agnes、Edmund、Winnie同Lilian 一行五人率先抵達，辦完入營手續後獲分配一個大單位，有廳、2間房同2個洗手間，不過冇得cooking，衛生環境唔錯，Agnes話這個營是保良局最新的一個。特別一提的就是這裡是好親近大自然的，飛蛾、甲蟲、cockroaches、不知名的小昆蟲到處皆是。仲有平時極少見的蛤怪，望真d其實佢地都幾cute架。

同個細路炒車

放低行李，換上勁裝之後，立即駕上風燭殘年的單車馳騁一番、順便認認路 … 點知嚮個彎位同個細路 … 炒車，不過好彩係佢墊住我，幾唔好意思呀。跟住最好笑就是個細路d friend 向個細路阿媽報告佢個仔同人炒車，個阿媽當然好緊張啦，係咁問點呀點呀，又問有冇 '大人'在場，細路d friend就答: 「佢咪就係同個'大人'炒車囉!」而呢段對白場面就正正比Agnes 聽到，唉 … 我幾瘀呀!

蟻翼雨

晚飯係BBQ! 可能想落雨，個BBQ 爐對上支街燈有成百隻飛蟻圍位支燈癲晒咁飛，d蟻翼好似落雨咁跌晒落黎，有d飛蟻得番個蟻身嚮地上躝躝下，有d仲由我地d褲腳飛左入大髀內側添 …

金魚劫

食完BBQ就梗係去食宵夜啦，係腐竹糖水，之後就一行9男女 (BBQ 期間有Jennie, 亞瑩, Joyce 同基榮加入) 散散步。我地就嚮釣蝦場附近吹下水，突然Edmund 走黎同我講指住個大水桶話d金魚浮晒上水面，我一望 … 初時我直頭睇唔明，望落去似..好多好多餵魚用o既麵包，再望真d，唔得了喇！全部都係反晒肚o既金魚呀，果d就係日頭比d小朋友釣o既金魚呀 … 情況實在好嚴重 … 我見到用黎打氣條膠喉根本pump 唔出氣，我立即嚐試較大個power但唔work，跟住就直衝入office 叫人，佢地出黎見到都〝嘩〞一聲。之後就 … 一袋袋百佳袋咁運走 …。

睇番哩件事，我發覺Edmund 都真係幾細心，桶魚係隔住圍欄唔容易睇到，Edmund 今次值得一讚 (…掌聲雷動…)。而Joyce 就好積極參與善後工作，協助工作人員辨認邊條金魚仍然生還，做得好 (…請再報以熱烈鼓掌…)!!

囉你命3千…..

響短短兩日一夜入面，我地玩左地獄野外定向、死亡攀石、奪命繩網陣、彷如隔世康樂棋、超級無敵滴滴仔、跳彈床、羽毛球…，根據現場高度只及我條腰咁高o既細路所講，康樂棋已有一種新玩法，原來我地已然out晒！經過呢一系列咁刺激o既活動之後，我流左3個月夾埋都冇流過咁多o既汗呀，第二日番工仲成身酸痛添！

特別一提就係奪命繩網陣當中，我覺得好深刻就係Jenny 毅力好驚人。佢果種唔服輸 d意志令佢響一個又一個幾乎失手o既動作奇績扭轉過來，真係好勁！

我們的主題曲

話明係 “Back to School” 就梗係要做番d野啦 … 首先同Agnes 媽媽班左架手提CD機，係托嚮膊頭果隻，好型架！跟住就係狂播舊歌，我就精選一連串我地高中預科至大學年代o既流行曲，好似有 “偷閒加油站”、“海闊天空”、“夏日傾情”、“繾綣星光下” 等等，而Edmund 仲yeah，佢精選d歌計有 “不信愛有罪”、“由零開始”、“感情到老”。就嚮我地沉醉梗之際，有兩個細路走埋黎問Edmund呢d係乜野年代o既歌，Edmund就答佢地 … 唱梗歌果個已經死左喇 … (唔知果兩個細路會唔會夜晚發惡夢呢？)。後來Joyce竟然都頂唔順懇求我地出到市區唔好再播咁話！唉ya … 呢 d 歌咪就係我們的主題曲囉！怕乜野播喎！

小結

今次呢個 camp實在搞得好成功，大家都玩得好開心。好老實講今次如果冇Agnes就唔會有呢次咁難忘o既回憶 (… 請基榮代表我地全體送上香吻一個 …)。佢真係好有heart! 由搵營地、出e-mail 打電話coordinate 我地每個人，出Itinerary、代我地比埋錢，仲專登星期五晚(落狗屎果晚)過海同佢媽媽借部手提CD機 …。真係唔知有乜野好講喇。

至於Rosa，我覺得佢唔黎呢個決定係o岩既，佢今時今日應該唔會適應到營入面o既環境、設施同埋食物，但同時間我亦覺得係佢o既損失。Anyway，下次去Winnie 屋企打牌聚會應該唔會say no 喇掛。

諗番起上次呢類型o既camp係入U果個O’camp，唉 … 眨下眼已經係超過十個年頭o既事喇 …真係有d感觸。我地今次一行九男女 … 竟然有八個已年過三十！此時此刻，不禁輕嘆流金歲月。


Maze 2005年6月3日